سؤيله ييش

يازيرام تبريزه، سؤيلرلي ديليم

عشقدن سؤيله كي شانيندا بيليم

تبريز عشقيم، تبريز آرخامدي، منيم

تبريز او جمشيده تك جامدي، منيم

گلميشم سنله سئويش باشلاماغا

او گئچن گونلره، گؤز ياشلاماغا

بوردا ائللر وار، اوزاق دوشموشولر

باغريلار اوتدا قاليب، بيشميشيلر

گل "فئرئيدن"ده ائله قافقازي گؤر

گورجو گؤر، ائرمنيلرنن بیزی گؤر

ديليميز دؤندو، بؤلوم بيچمكدن

درده باخ بير بئله، اؤز كئچمكدن

بوردا دا، چنلي بئليندن وار اثر

يئتيرن يوخ، گتيره بؤيله خبر

گنه ده واردي قولاغيمدا او ساز

كي دييردي گنه گلميب آيواز

گل آشيق، ايندي چؤگور چالماليسان

باجي آننه غميني¹ آلماليسان

گل آشيق، باشلا او ساز چالماغيوي

گؤرميه ك بؤيله غريب قالماغيوي

ساز چاليرسان غريبيم چالماغي تك

سؤز ساليرسان بالا سؤز سالماغي تك

قارداشا اوخشاتيبام قاشلاريوي

دولوخوبسان گؤرورم ياشلاريوي

گل آشيق داديما چات، سؤزلريمه

قوي آياغ ياش تؤكه لي گؤزلريمه

باخ آشيق! بوردا غريبلن ميييرم!

اوره گيم هرنه دئييب دئه، دئييرم!

سوسوزام سؤزلريزه، سازلاريزا

توركچه كولتوره، طنازلاريزا

بو فئرئيدن بو سيزين هيمتينيز

گؤروم آنجاق نيج ائلر غئيرتينيز

تبريزيم! تك يئريمه، تك پوزولور

كؤكه دؤن، دؤنمه ين آنجاق ازيلير

سن باش اول، زنگان اولور قول بدنه

اورميه نيجه كاكول بو تنه

اردبيل دير بوداغين، يا سنه گول

كندلر كؤيلر آغاجين كؤكو بيل

"تيركتيم" آدلاما كندلر ايچينه

اونو اوخشات ايرانا بلكه چينه

دوغما يوردوم، اوجا كنتيم ياشاسين

فخر اينن گؤگلر اینن باش قاشاسين

باشين آچمير نييه داد ائيله ميسن

حقلريندن نييه ياد ائيله ميسن!

جان يوخونسان، سنه جان وئرمه لي يم

ديل يوخونسان من ليسان وئرمه لي يم

بونو بيل، قالمالي آديندي سنين

"روم"دان "تاريما²" ياديندي سنين!

ديليم اؤلمز، اونا من ياس توتامام

"كئيماس³"يم اؤلسه ده، كئيماس توتامام

ياشا شهريم ياشا، من سيز ده ياشا

سؤيله من سيز، نه يين اولموش چاواشا:

بؤيوگ اوغلو بيزه سن آرخايين اول

سؤزلرين يومشاق اولا، گؤستره يول

توركچه يير او قلندرلره ياز

كي قيليج ووردولار آمما قلم آز

دارليغا چاتدي منيم گئن گؤنولوم

بئله دارليق، بئله وارليق نه ائليم

(گلپايگان/قيش1376)

1- آشيق غريبين اؤز اوينه قاييتديغي آنا اشاره دير.

2- قوزاي چين ده تاريم بؤلگه سي، چين توركيستاني.

3- آتامین عمیسی ميرزا حسين مسلمي (كئيماس)، كنديميزده تك بولونان تورك فولكلورونون جانلي خزينه سي؛ اونون اؤلومو ايله بو خزينه ده نئيله گئتدي!

برچسبها: فریدن, تبریز, شعر ترکی, تقدیم به تبریز

+ نوشته شده در سه شنبه نوزدهم بهمن ۱۳۹۵ساعت 9:35 توسط حسين مسلمي |